Ändlig goht's wider los!

Zerscht fiire mir no dr Nationalfyrtig.
Mir wynsche euch e scheene 1. Auguscht mit guetem Ässe, Füüürwärgg und gmüetlige Stunde.
Denn isch d'Summerpause aber gly verbi.
Am 12. Augschte träffe mir uns zur erschte offizielle Proob vom neye Vereinsjoor.
D Instrument wärde bis denn entstaubt, putzt und früsch göölt. D Vorfreud isch scho riesig. Ändlig goht's wider los!

Scho am 29. Augschte stoht dr erschti Ufftritt aa.
Mir derfe am Hunne-Gelaage spiile.
Also, kumm in dr Lange Erle verbii und loss di vo unserem Sound und däm vo dr Basler Garde Clique,
dr Gugge Akademiker, em Stevie H2D, dr Guggemuusig Ohregribler und natürlich vo de Hunne mitrisse.

Mir freye uns uff vyyli bekannti Gsichter.

Mir gsehn uns hoffentlig am Hunne-Gelaage. Bis denn!

16. Juli 2026

Generalversammlig 2026

An dr erschte Generalversammlig vo Oorwurm Basel hän mir uff e erfolgrychs Vereinsjoor derfe zrugg luege
und d Weiche für s näggschte Vereinsjoor stelle.
Nebst de regulääre Gschäft sin dr Vorstand, d Ämter und d Kommissione bestätigt worde.

Dr Vorstand setzt sich wie folgt zämme:
Dominik Flückiger, Flavio Macquat, Sabrina Pfluger, Tobias Pfluger, Stefan Furler, Stefan Masthoff und Daniel Hauser
An däre Stell danggä mir dr Lea Homberger ganz härzlig für ihre grosse Isatz und ihri wertvolli Arbet im Vorstand.

Au unseri Musikkommission isch bestätigt worde und bestoot us:
Michael Pfluger, Melanie Malzach, Stefan Masthoff sowie Tobias Pfluger
E bsunders grosses Danggeschön goht an dr Michi Pfluger für sy langjöörigi
und unermüedlichi Arbet als Major vo Oorwurm Basel.
Wär sy Noochfolg atritt, bhalte mir no es Zytli für is – meh derzue git's, wenn dr richtig Moment do isch.

Bsunders gfreut het d Ernennig vo vier no aktive Gründigsmitglider zu Ehremitglieder:
Sabrina Pfluger, Lea Homberger, Stefan Masthoff und Michael Pfluger.
Mir gratuliere ihne vo Härze zu däre verdiente Ehrig und danggä für ihr langjöörigs Engagement für Oorwurm Basel.

 Mit neye Mitgliider, viele Idee und e Huuffe Motivation luege mir voller Vorfreud uff s näggscht Vereinsjoor.
Mir danggä allne für ihre Isatz und freue uns uff e wiiters Joor voller Härz, Spass und Musig!

Will mir grad alli binenander gsi sy, hän mir im Aaschluss an d GV au grad no s Sujet für d Fasnacht 2027 bestumme.
Pssssssssssssst...
No bhalte mirs unter em Deckel. Als Gönner kasch aber am 24. Jänner 2027 als Erschte e Blick druff wärfe
und s Sujet bestuune. Bis denn heisst's: gwundrig blyybe!

04. Juni 2026

Neyi Mitglieder bi Oorwurm

Mir freye is, drei neyi Gsichter bi Oorwurm begriesse z dörfe:

Jolle, Lexi und Adi

Mir heisse euch härzligg willkomme in dr Oorwurm-Familie und freye is uff die erscht Fasnacht mit euch.
Zämme git’s viil Musig, gueti Stimmig und vill unvergässligi Momänt.

Schön sind dir derby!

Mir hoffe dass mir Eych denn glii au no wyteri neyi Gsichter dörfe vorstelle.
Mir sin gspannt uff unseri wytere Neumitglieder.
Spiilsch du Sousaphone und wotsch uns in de tiefe Tön unterstütze?
Denn mäld di bi uns mir bruuche nämligg no Verstergigg.

01. Mai 2026 

Jooresrüggbligg.... 

Am letschte Mittwuch hämmer unsere Jooresrüggbligg kah und mr derfe uff e lessigs und ereignisriichs Joor zrugg luege.
Zämme hän mir, uff und näb dr Byhni ganz viiil schöni Momänt derfe erlääbe und die revue passiere loh.
Wie bereits scho chli Tradition am Jooresrüggbligg nämme mir unseri Aawärter unter d Lupe.
Mit grosser Freud begriesse mir an dr GV 6 neyi Aktivmitgliider in unsere Reihe.
Glychzytig gratuliere mir unsere Anwärter wo die erschti Fasnacht mit uns absolviert hän, zem Übertritt zum Anwärter 2.
Leider heisst’s au Abschied näh: Zwai Aktivmitglieder verlöön uns per Generalversammlig.
Mir bedanke uns vo Härze für ihre Ysatz und die unvergässlige Momänt.

Am 15. April starte mir mit unsere drey Neumitglieder-Probe und luege voller Vorfreud ins neye Verainsjoor.
Wenn au Du bi uns wotsch mitmache denn mäld di doch über unseri NEUMITGLIEDERSYTE.

27. Meerz 2026