Oorwurm Basel
2013
Dr Aafang
D Idee für Oorwurm Basel entstoht scho im Joor 2012. Dr Fokus isch vo Aafang aa klar: e Gugge für die drey scheenschte Dääg, ohni s ganze Joor voll z verplane.
Es wird telefoniert, diskutiert, organisiert, verworfe und nomol vo vorne aagfange. Us dr Idee vo e paar yygflaischte Fasnächtler wird langsam es konkrets Projekt. Im 2013 nimmt die ganz Sach denn Form aa. Die richtige Lüt finde zämme und mache konkreti Plän. Es Probelokal wird gfunde, die erschte Stüggli wärde usgsuecht und d Grundlag für Oorwurm Basel isch gschaffe.
2014
Die erschti Fasnacht
Mit 13 Mitgliider stoht Oorwurm zum erschte Mol an dr Basler Fasnacht uff dr Gass. Noch ville Probe, Vorbereitige und em nötige Feinschliff isch es sowyt. Die erschti Fasnacht als Gugge wird gmeischteret. E Momänt, wo viilne vo de Gründigsmitgliider bis hüt in bester Erinnerig blibe isch.
2015
Wachstum und Wurzle
No dr erfolgryyche Premiere wird wyter an dr Gugge gschafft. Neui Mitgliider finde dr Wäg zu Oorwurm und s Vereinsläbe fangt aa sich z entwickle. Us em ursprünglige Projekt wird langsam e feschti Formation.
E bsunders Highlight isch dr Iizug ins eigene Probelokal in Rynach, wo bis hüt unser Deheim isch. Das isch au dr Start gsi für unsere legendäre Gönner-Brunch, wo zerscht im Probi und spööter au in de leerstehende Rüümligkeite vom Tech-Center stattgfunde het.
2016
20er-Marke isch knaggt
Oorwurm Basel wachst wyter. Mit em überschritte vo dr 20er-Marke wird klar, dass d Idee vo Oorwurm funktioniert. Immer meh Fasnächtler finde Gfalle an dr Kombinatioon us gueter Musig, überschaubarem Ufwand und dr Freud an dr Fasnacht.
2017
E eiges Gsicht
Oorwurm Basel het sich etabliert. Dr Zweiwucherhythmus bi de Probe bewährt sich, und d Gugge wird zum feschte Bestandteil im Fasnachtskaländer vo de Mitgliider.
Glychzytig wird mit vyyl Herzbluet an dr Wyterentwicklig vo dr Gugge gschafft. E wichtigs Projekt in däm Joor isch d Entwicklig vo unserem Logo, wo Oorwurm bis hüt begleitet und wiedererkennbar macht.
2018
D 30er-Marke und s erschte chlyne Jubiläum
Mit dr 30er-Marke wird dr näggscht Meilestei erreicht. Glychzytig derf Oorwurm scho uff fünf Johr Vereinsgschicht zrugg luege. Was als chlyni Idee von e paar Fasnächtler aagfange het, isch mittlerwiile zu Oorwurm Basel mit sim unverkennbarne Sound und em eigene Charakter aagwachse. E bsunders Highlight in däm Joor isch dr Ufftritt im Studio vo Radio Basilisk gsi, wo mir live hän derfe spiile. Unser Probelokal het im Summer es Update becho und mit vyyl Eigelaischtig hän mir an unserem Probi gschafft.
2019
Wyter uf Kurs
Musikalisch wie au organisatorisch entwickelt sich Oorwurm ständig wyter. Mit dr Gründig vo de «Macher» im 2018 wird e wiitere Schritt gmacht. Noch dr Fasnacht findet dr erscht offizielli Jooresruggblick statt, und die wichtigschte Ereignis und Entscheidigge wärde zum erschte Mol in eme Protokoll feschtghalte. D Fasnacht blybt dr Mittelpunkt vom Vereinsjoor. Aber au under em Joor pflegt Oorwurm s Vereinslääbe mit eme Grillfescht, Proobedääg und andere gmeinsame Aaläss in dr Vorfasnachtszyt.
2020
E bsunders Joor
Wie für die ganzi Basler Fasnachtswält bringt das Joor au für Oorwurm e grosse Schock. Wird doch am Frytig vor em Morgestraich d Fasnacht kurzfristig abgseit. E Situation, wo bis dert ane no niemer vo uns erläbt het.
Alles isch parat gsi und nach em erfolgryyche Gönner-Brunch isch d Vorfreud riesig gsi. Trotz allem isch dr Zämmehalt bestoh bliibe, und statt im Kostüm uff dr Gass Musig gmacht, hän mir am Fasnachtszyschtig zämme im Deyfelhof Znacht gässe.
2021
Warte uff besseri Zyte
Noch em Ussnahmejoor isch Schritt für Schritt wieder meh Normalität möglich worde. D Vorfreud uff s Musiziere und uff d Fasnacht isch gröösser denn je gsi.
Trotzdem het au 2021 kei Fasnacht chöne stattfinde. Grad in däre Zyt het me gmerkt, wie wichtig d Fasnacht und dr persönligi Kontakt für alli Mitgliider sin. Leider het au dr traditionelli Gönner-Brunch nit chöne duregfiehrt wärde und d Byhni isch leer bliibe. Umso grösser isch d Vorfreud uff dr Moment gsi, wenn s ändlig wieder hätti chöne losgoo.
2022
Mit Volldampf wyter
Endlig git s wieder chly Gwoohnheit im Fasnachtsalltag.
Mir hän unsere Gönner-Brunch im Probi duregfüehrt und drbi feschtgstellt, dass unseri Gönnerfamilie über d Joor ordentlich gwachse isch. Unser Probi het sich als chli z chly für so vill Gäscht usegstellt.
D Fasnacht isch denn zwar anders gsi als gwoohnt, aber mit umso meh Härzbluet. Mit em Sujet «Wyter goots!!!» hämmer e bsunderi Fasnacht erlebt. Drey Daag lang ziehts d Fasnächtler dur d Gasse vo Basel – ohni Cortège, ohni Wääge, aber mit umso meh Fasnachtsgfühl. Es isch fascht wie drei Daag Zyschtig gsi.
2023
D 40er-Marke und
die 10. Fasnacht
Mit dr 40er-Marke wird dr nöchscht grossi Meilestei erreicht. Glychzytig erlebt Oorwurm sini 10. Fasnacht uff dr Gass und fühlt sich getreu em Sujet "Stark wie no nie!!". E bsunders Joor für alli, wo dr Verein über die erschte Dekade begleitet hän.
Us em Gönner-Brunch isch mittlerwiile dr Genneraalass worde. So hän mir e Mögliichkait gfunde, unserne treue Gönnerinne und Gönner au wyterhin für ihri Unterstützig z dangge.
2024
E wiiters Kapitel
Oorwurm entwickelt sich musikalisch und vereinsintern wyter. D Vorbereitige für die näggschte Schritt im Vereinsläbe laufe uf Hochtoure. Ab em Herbscht dörfe mir d Nuggi-Spugger als Untermieter in unserem Probelokal begriesse. E schöni Entwicklig und e wiiters Kapitel in dr Gschicht vo unserem Probi.
2025
Offiziell e Verein
Us dr lockere Formation wird offiziell e Verein. Statute wärde verabschiedet und organisatorisch wird Oorwurm uff es stabils Fundament gstellt. Mit däre Veränderig wird us em loggere Zämmeschluss offiziell dr Verein «Fasnachtsgesellschaft Oorwurm Basel». Trotz allem blybt dr Ursprungsgedanke vo 2013 unverändert. D Freud an dr Musig und an dr Fasnacht stoht no immer im Mittelpunkt.
2026
Hüt
An dr Fasnacht 2026 zellt Oorwurm über 45 Mitgliider. Vil meh Plätzli hämmer nümmi zum Vergää. Neui Mitgliider könne mir nur no vereinzelt uff einzelne Register uffnäh, drmit die musikalischi Bsetztig au verhebbt. Wenn me uff die letschte Joor zrugg luegt, wird klar, wie positiv sich dr Verein entwickelt het. Us ere Idee vo e paar Fasnächtler isch e fescht etablierti Fasnachtsgesellschaft worde.
Mit em Blick in d Zuekunft
blybt Oorwurm sim Wäg treu und freut sich uff alles,
was no chunnt. Do e glaine Ussbligg.
2027
D 50er-Marke
An dr Fasnacht 2027 wird Oorwurm voraussichtlich über 50 Mitgliider zelle und drmit d 50er-Marke knagge. Somit hämmers fascht zu unserer Optimalbsetztig gschafft.
E wytere Meilestei in dr no junge, aber erfolgryyche Gschicht vo Oorwurm Basel.
2028
15 Joor
Oorwurm uff dr Gass
2028 derf Oorwurm Basel scho sini 15. Fasnacht erläbe. Mit Stolz luege mir uf die letschte 15 Johr zrugg und freue is uff alles, was no vor is liggt.
D Gschicht vo Oorwurm Basel isch no lang nit fertig gschribe…..
S nöggscht Kapitel wartet scho.