ÜBER UNS

Dr Wäg und d Wurzle

Die maischte Mitgliider vo Oorwurm Basel sin syt Joore yygflaischti Fasnächtler und iiri Wääg hänn sich immer wider
in verschiidene Guggemuusige oder an diväärse Guggenaaläss grüzt. Wie s halt eso isch, die fäälendi Zyt,
dr Job oder d’Familie hänn dr Aint oder Ander drzue biwooge, mit brielende Auge mit Guggemuusig uffzhööre.
Aber eso het mes nid chöne stoo loo! Drum isch d Idee entstange, e Gugge z gründe, wo sich uuf
 „die drey scheenschte Dääg“ konzentriert und s’Joor dure nur all zwai Wuche probt.

S erschte Kapitel

Me het umedelifoniert, umegfrogt und sich emol troffe. Die musikaalisch Bsetzig isch schnäll zämecho,
s Probelokal isch gfunde, die erschte Stüggli ussgsuecht und aagspiilt worde. Und scho isch glaar gsi, mir sin spiilfähig!
Mit vyyl Freud und Dynamik hämmer Goschdyym blaant, ai Lied noo em andere yygspiilt und alles
am ene luschdige und erfolgryyche Proobedaag no e weeneli gschliffe.
Us eme zämmegwürfledde Huffe isch e tolli Formazioon worde, mit Musig, Witz und Charme!

10 Johr spööter…

Nach über 10 Johr stöh mir hüt mit über 45 Migliider do – e bunt gmischti Truppe vo jung und jungbliibene Fasnächtler.
Us dr Ursprungsidee isch längst meh worde, e Familie, wo zämme musiziert, lacht, feschtet und Fasnacht mit Härzbluet lebt.
Glichziitig isch d Ursprungsidee, e Gugge mit minimalem Ufwand, bis hüt fescht verankert.
Mir probe nach wie vor im Zweiwucherhytmus, träffe is mit Freud an unsere zwei Probedääg,
wo mir zäme üebe, lache und s Vereinsläbe zelebriere.
Mir luege stolz zrugg und mit viel Vorfreud in d Zuekunft. D Liidenschaft für d Guggemusig isch ungebroche,
und mir freue is jedes Joor druf, d Fasnacht mit unserem Sound und unserem Charme verzaubere!

D Zukunft im Bligg

Mir wänn au i Zuekunft dynamisch, fröhlich und musikalisch ungerwägs sii, mit dr nächschte Generation
im Blick und em Gfühl vo Fasnacht im Härz.
Mittlerwiile isch Oorwurm e Verein worde – mit Statute, Struktuur und allem drum und draa.
Aber trotzdäm stöhn mir no immer fescht zu unsere Usprungsgrundsätz,
möglichscht wenig Ufwand, möglichscht viel Spass, gueti Musig und e gsundi Portion Fasnachtsliebi.
Neui Migliider sind immer willkomme – egal ob mit Instrument oder mit em Wille, e Teil vo öppis Bsunderem z sii.

 

Oorwurm Basel syt 2014 uff dr Gass
Joor für Joor wieder baraat für die "drey scheenschte Dääg", luschtigi Probe und e gueti Zyyt zäme!